Në kuadër të hartimit të projekt-buxhetit për vitin 2027, Bashkia Shijak fton donatorë, organizata ndërkombëtare, agjenci zhvillimi, fonde bashkëpunimi dhe partnerë të interesuar të mbështesin financimin e hartimit të projekteve teknike për investimet prioritare në territorin e saj, në fushat e mëposhtme:
- Shkollat: rikonstruksioni, rehabilitimi dhe përmirësimi i ambienteve shkollore dhe të infrastrukturës përreth tyre;
- Rrugët: rikonstruksioni dhe asfaltimi i rrugëve ndërlidhëse dhe urbane, trotuaret dhe ndriçimi publik;
- Kanalet vaditëse dhe ujitëse: rehabilitimi dhe ndërtimi i kanaleve për mbështetjen e bujqësisë;
- Kullimi i ujërave: sistemet e kullimit të ujërave të bardha dhe atyre të sipërfaqes, si dhe masat kundër përmbytjeve;
- Infrastruktura të tjera publike me ndikim në jetën e përditshme të banorëve.
Mungesa e projekteve teknike të plota është një nga pengesat kryesore për aksesimin e fondeve të investimeve. Mbështetja në fazën e hartimit të projekteve ka ndikim të drejtpërdrejtë në realizimin e punimeve në vitet në vijim dhe në përmirësimin e kushteve të jetesës për komunitetin tonë.
Bashkia Shijak është e hapur për bashkëpunim dhe do të ofrojë informacionin, të dhënat teknike dhe mbështetjen e nevojshme për çdo partner të interesuar.